16 April 2010
Wat jy verwag is nie altyd wat jy kry!
Jan Steyn
Oom Klaas Koringkorrel bly olik, die doktertjie het hom keer op keer van kop tot toon ondersoek, maar te vergeefs. Raadop gee hy toe vir oom Koringkorrel ‘n leë glasbotteltjie en sê: “Oom, bring asseblief môre vir my ‘n semenmonster.”
Die volgende oggend kom oom Klaas daar in, maar die botteltjie is leeg. “Oom,” vra die doktertjie; “waar is die monster dan?”
“Nee ou seun,” seg oom Klaas Koringkorrel, “eers het ek met die linkerhand probeer, toe weer met die regterhand. Daarna het die vrou met haar linker en regterhand probeer… maar ai ou seun, ons kry niks reg nie. Later het die vrou met haar mond probeer. Eers met en toe sonder tande. Einde ten laaste het ons die jong buurvroutjie gevra om te probeer. Sy het altwee haar hande gebruik, onder haar armholte, dit selfs tussen haar knieë probeer…!”
“Haai oom!” roep die doktertjie geskok uit. “Oom kon dìt mos nie van haar verwag nie!”
“Ai ou seun, ons het mos geen keuse gehad nie, ek en die ou vrou was al radeloos. Jy het dan so mooi gevra vir ‘n monstertjie en ons twee hèt toe al als probeer, maar selfs die buurvroutjie kon nie die botteltjie se deksel afskroef nie!”
Ja, ek het jou lekker gevang met Oom Klaas Koringkorrel se botteltjie storie! Wys mos net weer, wat ‘n mens verwag is nie altyd wat jy gaan kry nie. Vat nou maar die invoertarief as ‘n voorbeeld. Almal het verwag dat daar teen die tyd al ‘n lekker vet invoertarief ingestel sou wees, maar tot dusver is daar nog geen teken nie. Planttyd is op hande en die koringprys is nog steeds te laag om ons insetkoste te dek.
Sondag het ek met Andries Theron van Graan SA gesels. Hy sê hulle kry geen terugvoer van regeringskant nie. Dit kom voor of die regering se deure voor hul toegeklap word. Die Minister van Landbou maak geluide van broodpryse wat te hoog is, nou wie dink sy moet ons daarvoor bedank. Beslis nie koringprodusente nie! Hulle kan nie eens hulle eie produk se prys vasstel nie, het in teendeel geen invloed hoegenaamd op die brood se prys nie!
Terug na die invoertarief. Ek het ‘n voëltjie hoor fluit dat ons of vandag of voor volgende Vrydag sal hoor en die voëltjie is positief dat ons iets sal kry. Maar kyk ons na die mark, dan sien ons nog nie ‘n teken dat die voëltjie se fluit enigsins gewig dra nie.
Aan die anderkant het die prys wegbeweeg vanaf die R2100 vlak op na R2150 vlakke. Kan dit wees dat daar slegs ‘n klein tarief ingestel gaan word en die mark dit met R50 in berekening bring? Of is die kopers ook maar net so onseker soos ons? Indien eersgenoemde wel die geval is, dan sal ons volgende week die mark mooi moet dophou. Styg die prys vinnig met nog so ‘n R50 of wat, dan moet ons maar van ons koring verkoop. Want indien die tarief laer is as wat die mark verwag, kan ons dalk weer ‘n daling in pryse sien.
My vriend Gieter Spekskieter, het so pas hier ingeloer. Hy is hoogs geleerd op tegniese analiese, ‘n wyse man. Gieter sê dat die tekens daarop dui dat die Desemberkoringkontrak besig is om van sy laagtepunt weg te beweeg opwaarts. Hy praat van pryse tussen R2300 en R2400 vir Desember. Maak jou som en kyk of jy daarvoor kan koringsaai. Soos Gieter se laaste naam aandui kan hy geensins verantwoordelik gehou word vir sy praatjies nie, die prys kan hoër of laer wees voor die einde van die jaar!
Nouja, fluit-fluit my storie is na amper vyf jaar uit!
Ek gaan weg van BKB GrainCo na ‘n ander maatskappy in dieselfde bedryf en gaan daarmee saam ook weer voltyds boer. Dit is dan die laaste Koringrubriek van my kant. Baie dankie vir jou as leser se geduld met al die onsin wat ek kwyt geraak het. Sterkte met die planttyd wat voorlê en moed hou. Ons is mos trots Koringboere, die wiel sal weer in ons guns draai!